"Mem bro", skrivet gant Loeiz Herrieu ha distaget gant Albert Bocher
Barzhoneg brudet Loeiz Herrieu klevet e Kan ar Bobl 2008 e Pondi. Brav ! , Ma bro a zo du-hont Ma bro a zo du-hont, e penn pellañ an douar, E geol digor ur mor diroll, deiz ha noz e kounnar. Ma bro a zo du-hont, mantellet razh e glas, An avel bras ouzh he fokiñ hag o pariñ he fas (amañ : Ma bro a zo du-hont, mantellet razh (holl) e glas, Ha flourikaet gant an avel o redal gant he fas.) Ma bro a zo du-hont, ‘lec’h ma tiwisk bemdez An heol, kent mont d’e wele blod, bragoù e vraventez. Ma bro a zo du-hont, evel ur vag diluz, E stlej ar bed kozh war e lerc’h, war vor ar faltazi. Ma bro a zo du-hont, gwazhiet ha torgennet; Goloet a goad, goloet a frouezh, a eostoù alaouret. Ma bro a zo du-hont, hañv ha gouiañv e bleuñv, Hañv ha gouiañv en he sulieg, get kaerded ar maezoù. Ma bro a zo du-hont, dishañval doc’h pep bro, Get he c’hroazioù, he feunteunioù, he chapelioù distro. Ma bro a zo du-hont, el lec’h ma vleuñv bepred, A-dreist bezioù ar yezhoù marv, yezh nerzhus ar Gelted. Ma bro a zo du-hont, c’hoantaet holl gant ar bed, Evit nerzh-kalon he zud yaouank ha koantiz he merc’hed Ma bro a zo du-hont, Breizh a raer anezhi, Distag doc’hti ne hellan ket, filimet on dezhi ! Du-hont emañ ma c’hêr, kuzhet e-mesk ar gwez, Hag a-ziwar dreuzoù ma dor e welan ‘met an neñv Diwar dreuzoù ma dor, un eostig a glevan, Me ‘garehe kanal ken flour ar vro gaer a garan. (Pell doc’h ar Vro)
Posted by gireg konan on 16/04/2008